NUTTATA
Sta nuttata
pare ca nun passa maie!
Nu viecchio cammina p''a via
strascennannese 'o piso
'e nu juorno,scucciuso e pesante,
cercanno nu pizzo p''o suonno.
Nu giovene 'int'a n'angulo tremma,
'a serenga 'int''e mmane,
e cu' l'uocchie appicciate e lucente
guarda l'ago che trase 'int''e vvene.
Cchiù 'nnanze appuiata a 'o lampione,
na femmena-masculo aspetta
cu''a gonna accurciata e slacciata
pe' sfugà desiderie carnale.
Na voce abbrucata 'e mbriaco
va cantanno parole d'ammore
'e na vecchia canzone scurdata
cu' l'affanno 'int''o core.
E 'a notte, 'a notte,
pare ca nun passa maie.
'A dint'a nu vascio
esce n'ommo stunato d''o suonno
cu''a tuta 'nzevata 'e fatica
e 'a marenna 'int''o fuoglio 'e giurnale.
S'arape na vecchia puteca
e s'affaccia 'o furnaro
tene mente na pala 'e lignanmme
e nu vico ch'è scuro...
po' n'autista 'e pullmanne
che corre,
nu cane che scenne
p''a primma pipì,
e 'o sole,stu sole,
ca trica a venì
e 'a notte...'a notte,
pare ca nun passe maie!...
da 'E GGRANATE
Edizioni TIERRE-Napoli - 1990
NU MUZZUNARO
Addenucchiato 'nterra 'o marciappiede,
'a faccia stanca, ll'uocchie russe 'e freva,
ll'affanno 'mpietto, arronza nu muzzone
se gira attuorno e po' se fa cchiù llà.
Pe' fa passa' na prucessione 'e ggente
che va, senza tenerlo manco mente,
pecche' va 'e pressa, corre comme 'o viento,
senza fermarse, senza risciata'.
L'aggio guardato a chistu pover'ommo
e aggio penzato a comme l'assumiglio
pur'io vaco cercanno a tantu tiempo
comme a stu puveriello pe' campa'
nu surzo 'e bbene 'e na passiona antica
nu sentimento, e tiempe d'ogge, raro,
e sto a livello cu' stu muzzunaro
ca cerca, inutilmente 'a carità...
NU VASCIO...
Ddoje segge 'e paglia rotte
nu tavulo tarlato
na branda militare
na gatta spellacchiata
na pianta 'e rose rosse
na cajola
cu' dinto nu cardillo
chino 'e voce
chisto è 'o ritratto
'e stu vascio.
Nun po' campa'
chi va cercanno 'a morte
e dint'a chistu vascio malandato
nu vicchiariello miezo rimbambito
sta aspettanno 'o mumento
pe' muri'.
Si fore ce stà 'o sole
oppure 'a neve
p''o viecchio è 'a stessa cosa
aspetta sulo chill'appuntamento
comme s'aspetta na perzona cara.
Pure 'o cardillo aspetta chillu juorno
pe' se gude' nu poco 'e cielo azzurro
e 'o sta tiranne 'e piede, guarda attuorno,
e canta... canta...
pecchè sente vicino 'a libertà.
1971
'A MAMMA 'E TUTT''E MMAMME
Madonna, è overo o no ca tu si' 'a mamma
'e tutte quante 'e mmamme 'e chistu munno?
E ch'arravvuoglie cu' nu manto 'e bbene
'a casa 'e tutt''o popolo d''a terra?
Pecchè p''a mamma nun c'è differenza:
'e figlie songhe tutte tale e quale
'e ttene dint''o core tutte quante,
pure si cchiù 'e na vota 'a fanno 'o mmale.
'A quann'ero guaglione aggio 'mparato
a te purtà rispetto e devozione,
a te venì a precà tutt''e dummeneche
e a farme, almeno a pasca, 'a cummunione.
Però nun te cunzidero cchiù mamma,
è nun penziero nun è na jastemma,
pecchè permiette 'e fà sprecà miliarde
mentre ce stà po' chi se more 'e famme...
Perduone a chi fa chiagnere 'e ccriature;
prutiegge chi ce sfrutta e campa buono;
ma chesto è contro 'a legge d''a natura,
cca 'a ggente perde 'a fede, te n'adduone?
Ma si te siente mamma, overamente,
e si ce tiene stritte dint''o core,
fa ascì pure pe nuje nu poco 'e sole:
stienne na mano a chi nun tene niente!
NU PARO 'E SCARPE NOVE E NA PAZZIELLA
Nu figlio d'ogge? So' dulure 'e panza!
Nun saje cu' quale vierze l'he a piglià
'o ccerto è che nun tene cchiù crianza
e cerca sulamente 'e te cuffià.
L'accatte 'a bicicletta ma po' doppo
vò già 'o ciclomotore e ce l'he a dà
ma nun l'abbasta e mette sempe 'a coppa
pretenne 'a moto e po' ancora chisà.
Io cerco, 'e vvote, d''o piglià c''o bbuono:
"'o ssaje ca nun ce 'a faccio a guadagnà"
'a mamma è pronta a le dà sempe raggione:
"E' giovane... che vuò, l'he accuntentà.
E avesse almeno na suddisfazione
d''o vedè allero quanno stà a pazzià
macchè, na faccia 'e peste, nu musone,
ca me venesse 'o sfizio d''o palià.
Gas, luce, telefono, pesone,
acqua, vestite, 'e sorde p''o magnà,
nun ne parlammo po' quanno è 'a staggione
nu mese 'o mare, embè, l'avimma fà!
Quanno abbusco 'o stipendio, a' fine 'o mese,
ce ne vulesse n'ato pe' campà
e ogne vota nasce n'ata spesa
tanto 'e cambiale che ce stanno a fà?
Ma stasera turnanno d''a fatica
so' restato 'ncantato a me guardà
na scena ormaje scurdata, scena antica,
'int'a nu vico 'e vascio a' "Sanità".
Nu guagliunciello scaveze e fetente
m'ha ditto: "m''a facite 'a carità?"
ma comme, aggio penzato, nu pezzente
'e chisti tiempe? Ma è na rarità!
Me so' fermato e ancora frasturnato
l'aggio spiato: "'e sorde che n'he a fà?
forze tuo padre starrà carcerato
e ve serve quaccosa pe' magnà?"
Gnornò, vurria sulo ddoje cose belle
ch''a sciorta nun m'ha fatto maje pruvà:
"Nu paro 'e scarpe nove e na pazziella"
mò ch'è 'a befana m''e vurria accattà.
Mammà faceva 'a vita e l'hanna accisa,
nun aggio maje sapute chi è papà,
Giesù, pe' poco n'aggio jastemmato,
tiene, aggio ditto, 'e sorde stanno ccà.
"Nu pare 'e scarpe nove e na pazziella"
tanto è custata na felicità...
E' notte e io spio a stu core 'e pastafrolla
Lucià, chistu è nu suonno, t'he a scetà!
'O MARIUOLO
Songo mariuolo, è overo, aggio arrubbato,
ma no pe sfizio, pe' necessità
e comme a' n'alluccuto so' caduto
juorno pe' ghiuorno 'int'all'oscurità.
Da 'o carcere so' asciuto, so' trasuto,
nu sacco 'e vote chi 'e po' maje cuntà,
quanno aggio ditto : basta ! Mo è fernuto,
so' stato po' custretto a 'ccummincià.
Ce stà chi dice ca so' delinquente,
nun costa niente 'e vvote giudicà ,
vulevo campà io pure onestamente
e aggio cercato 'e me riabilità.
Ma a ogne porta ch'aggio tuzzuliato
cercanno: "Me vulite a faticà?"
m'hanno chiammato pazzo o scemunuto
dicenneme: "Ma vide addò he arrubbà".
E allora si' so' nato cu' sta sciorta,
pecchè 'o destino nun m''a vò cagnà,
senza penzarce faccio palla corta
sfidanno 'a legge e pure 'a società.
Io arrobbo, trase e jesco, pe' tramente
'o tiempo 'e chesta vita adda passà
'o riesto, tutt''o riesto, è ccosa 'e niente
tanto nisciuno cchiù me po' salvà.
E si po' doppo... 'Ncielo pure Ddio
decidarrà che m'adda cundannà,
che me ne 'mporta, saccio 'o fatto mio,
faccio 'o mariuolo pe' ll'eternità!
FACCELLA NERA
'O juorno, tutt''e juorne,
vicino a nu semaforo staje là,
'mmiscanno 'a famma toja cu' chesta famma,
dicenno, cchiù 'e na vota, vu' cumprà?
Chisà 'a qua parte d'Africa tu viene,
pizzo d''o munno povero e stramano,
cu' n'atu Dio, cu' n'ata tradizione,
cu' l'uocchie fute e na faccella nera.
Staje là ch'aspiette
vide 'e passà migliare d'automobbile
pienze ca simme ricche ma nun saje
che dint'a sta rammera ce stà ggente
ch'adda fa 'e zumpe, ogn'ora e ogni mumento,
pe' cercà 'a strada pe' tirà a campà?
Nun stive meglio dint''a terra toja?
Che sarrà avara, che sarrà matregna,
che sarrà triste quanno scenne 'a sera
ma quanno è l'alba 'o sole 'nfoca ancora
appiccianno 'a speranza 'e nu dimane.
No, rieste llà,
dint'a chesta città che stà chiagnenno
'a secule cu''e llacreme 'e na mamma
che chiagne pecchè nun po' sfamà 'e figlie
ca comme a tte se ne so' ghiute fore
ca comme a tte forze stenneno ' a mano
chisà 'int'a quà paese furastiere
cu''a faccia janca ma cu''a sciorta nera
cchiù nera d''a faccella ca tu tiene
pecchè 'a miseria nun tene culore
nun tene razza o patria, è senza core!
